Plantun de Prouvènço

Pèr coumpara dos planto d'encò nostre

Veronica anagalloides & Morus alba

Verounico(-faus-mourihoun)

Veronica anagalloides

Plantaginaceae Scrophulariaceae

Autre noum : Pan-froument.

Nom en français : Véronique faux mouron.

Descripcioun :
Aquesto verounico trachis dins li mueio e en ribo d'aigo. Li fueio soun estrecho e la cambo boutisso. Se destrio de soun cousin, lou mourihoun-d'aigo, emé si flour blanco lavado de roso e subretout bonodi si boursèu pu long que large (>1,2). Coumpara emé lou mourihoun-d'aigo que ié sèmblo proun.

Usanço :
La verounico-faus-mourihoun se manjo en ensalado cruso o pulèu cuecho se vous mesfissas de l'endèrvo dóu fege.

Port : Erbo
Taio : 10 à 60 cm
Fueio : óupousado
Tipe bioulougico : Teroufite
Cicle bioulougico : Planto de l'an

Gènre : Veronica
Famiho : Plantaginaceae
Famiho classico : Scrophulariaceae

Ordre : Lamiales

Coulour de la flour : Blanco
Petalo : 4
Ø (o loungour) flour : 4 à 8 mm
Flourido : Printèms - Estiéu

Sòu : Ca
Autour basso e auto : 0 à 800 m
Aparado : Noun
Abriéu à setèmbre

Liò : Aigo - Ribiero - Mueio
Estànci : Mesoumediterran à Subremediterran
Couroulougi : Eurimediterrano
Ref. sc. : Veronica anagalloides Guss., 1826 (= Veronica anagallis-aquatica subsp. anagalloides (Guss.) Batt. 1889 )

Amourié-blanc

Morus alba

Moraceae

Àutri noum : Amourié, Amouhié, Amourié-rose.

Nom en français : Mûrier blanc.

Descripcioun :
L'amourié-blanc se rescontre encaro d'eici, d'eila, dins li colo e la campagno. S'èi naturalisa dins la valado dóu Rose. Se recounèis à si fueio óuvalo, en cor à la baso, e dentado. Se pòu vèire de varieta roso que ié dison amourié-rose (fotò).

Usanço :
Se saup que l'amourié, que nous vèn d'Asìo dóu couchant, fuguè proun cultiva pèr abali, emé si fueio, li magnan. Aquéli d'aqui manjon rèn qu'acò. Lou fru de l'amourié-blanc se manjo pas gaire au nostre, au contro de l'amourié-negre. Li fueio soun vertuouso pèr ajuda à digeri e dourmi, pèr lucha contro li fèbre e coume remaisso doulour.